Sýningar úti sem inni

Á fjölbreyttum sýningum Byggðasafnsins er hægt að kynnast einstakri sögu og menningu Hafnarfjarðar á lifandi, skemmtilegan og fróðlegan hátt allt frá landnámi til nútímans. Húsin sem Byggðasafnið hefur til umráða eru sex. Þau eru í aldursröð Sívertsens-hús (1803–5), Pakkhúsið (1864–5), Góðtemplarahúsið – Gúttó (1886), Siggubær (1902), Beggubúð (1906) og Bookless Bungalow-hús (1920). Settar eru upp árlegar þemasýningar í forsal Pakkhússins en annars eru fastasýningar í öllum húsum sem sýna hvernig þar var umhorfs. Útisýningar safnsins eru á skiltum í Hellisgerði, í undirgöngum við Hamarkotslæk og á 22 skiltum við Strandstíg.