Pakkhúsið

Í Pakkhúsinu eru að öllu jöfnu þrjár sýningar í gangi í einu, fastasýning um sögu bæjarins, leikfangasýning og þemasýning. Á sýningunni „Þannig var…” er saga Hafnarfjarðar og nágrennis rakin frá landnámi til okkar daga með aðstoð sagnfræðilegra texta, ljósmynda, teikninga, kvikmynda og fjölda muna sem glæða söguna lífi. Þar er hægt að fræðast um þýska og enska tímabilið í sögu bæjarins, verslunarsöguna, útgerðarsöguna, íþróttasöguna, hernámið, kvikmyndahúsin og margt fleira.

Á efstu hæð Pakkhússins er að finna leikfangasýningu safnsins. Sýning þessi, sem hið margverðlaunaða enska sýningafyrirtæki Janvs Ltd hannaði, er sérstaklega ætluð börnum. Á Byggðasafni Hafnarfjarðar er varðveitt stórt safn leikfanga og er hluti þess á sýningunni. Mununum er skipt reglulega út og því er alltaf eitthvað nýtt að sjá á leikfangasýningu Byggðasafnsins.

Byggðasafn Hafnarfjarðar setur upp nýja þemasýningu í forsal Pakkhússins á hverju vori. Núverandi sýning fjallar um Kaupmanninn á horninu.

Fjallar sýningin um sögu og þróun sem hófst í verslunarháttum í Hafnarfirði á þriðja áratugi 20. aldar þegar segja má að þróast hafi í að litlar matvöruverslanir hafi verið á öðru hvoru götuhorni í bænum. Fram að því hafði nær öll verslun í bænum verið í höndum örfárra aðila en þegar líða tók á þriðja áratuginn varð þessi breyting á verslunarmálum í Hafnarfirði. Fjölmargar nýjar verslanir litu dagsins ljós, starfsgreinaskiptingar urðu skýrari, verslunum fjölgaði og þar á meðal voru ýmsum sérvöruverslunum og sem juku enn á þjónustu við bæjarbúa. Sýningunni er ætlað að varpa ljósi sögu „kaupmannsins á horninu“ í Hafnarfirði á 20. öldinni, allt frá þriðja áratuginum og fram undir að þessir verslunarhættir liðu undir lok á síðari hluta aldarinnar.

Þemasýningin stendur í 11 mánuði.